Skrítið fólk

Það er ljóst að hópurinn sem vill halda í stimpilgjöldin, uppgreiðslugjöldin og níðinu á neytendum er soldið stór. Það er líkast til sami hópurinn og vill halda öryrkjum og eldri borgurum undir fátæktarmörkum. Getur verið að fólkið sem hefur það of gott og gefur skít í aðra sé orðið svona margt? Eða eru þetta bara bitur vinstri græn?

Mér finnst ríkisstjórnin vera gera góða hluti á mörgum sviðum, Jóhanna er að beita sér sterkt, ungi viðskiptaráðherrann var með ótrúlega flott útspil í síðustu viku og öll ásýnd og áherslur utanríkisþjónustunnar eru að breytast með Ingibjörgu Sólrúnu. 

Hvað er fólk að pæla? 

Fylgi við ríkisstjórnina minnkar

Hafa svindlað árum saman- eða a.m.k. reynt það

Það er ekkert langt síðan ASÍ sætti harðri gagnrýni vegna verðkönnunar sem gerð var í lágvöruverðsverslunum. Ég var nokkuð virk á bloggum annarra að segja mína skoðun og nú er hún bara að sanna sig. Það gengur ekki að gera verðkannanir öðruvísi en að fara sem neytandi, kaupa inn og fá strimilinn. Það er eina verðið sem gildir. 

Þeir sem þekkja mig vita að ég veit alveg hvað ég er að tala um. Ég veit að sumar verslanir eru verri en aðrar þegar kemur að því að reyna svindla á verðkönnunum. Þegar ég þekkti sem best til var það Nettó í Mjódd og núna virðist það vera Krónan. 

Þær raddir hafa lengi verið uppi að verð sé breytilegt í þessum verslunum eins og starfsfólkið heldur fram, þ.e. dýrara seinnipartinn og um helgar þegar minni séns er á verðkönnunum. Ég veit að reynt hefur verið að hanka verslanir á þessu en fjölmargar tilraunir báru engan árangur. 

Það verður gaman að fylgjast með hvað verður úr þessu máli.

Ég eeeeeelska neytendamál! Does that make me a nerd? Held ekki, it's hip to be square!

 

Segja vöruverð hækkað þegar ekki er von á könnunum

Hank Moody....

...er sko minn maður!

Alltaf verið að stela af mér!

Þeir sem þekkja mig vita að ég er afskaplega vel upplýstur neytandi enda eru neytendamál allskonar mér hugleikin. (Já, ég veit, það er nördalegt en svona er ég bara)

Undanfarið hef ég verið að velta því fyrir mér hversu miklu íslensk fyrirtæki stela af almenningi. Þá er ég ekki að tala um okur, heldur hreinan þjófnað. 

Um daginn var ég í Bónus að kaupa inn fyrir fjölskylduna. Karfan kostaði einhvern 16000 kall og meðan Ibbi raðaði vörunum í bílinn kíkti ég á innkaupalistann. Sá strax að ég hafði verið rukkuð allt of mikið fyrir kjúkling sem ég keypti. Ég fór aftur í búðina og fékk leiðréttingu upp á rúman 400 kall. Reyndar er leiðinlegt að fara inn og röfla. Sækja þarf einhvern yfirmann á kassann til að laga hlutina og á meðan stendur öll röðin og bíður eftir afgreiðslu, bölvandi helv...kellingunni sem er með vesen út af einhverjum smáaurum.

En ég fékk peningana mína og fór aftur í bílinn. Var þá komin í ham og kíkti á restina á kassakvittuninni. Sá þá að ég hafði greitt tvisvar fyrir Gullostinn en ég keypti bara einn. Svo ég fór aftur inn og var með vesen.

Þarna var Bónus næstum búið að hafa af mér 7-800 kall í einni innkaupaferð. Ekkert mál að vera alltaf með lægsta verðið í könnunum en hirða svo bara af manni 4-5% álagningu með svona mistökum. Reyndar heyrir maður að svona vinnubrögð séu alls ekki óþekkt hjá helsta keppinautinum, Krónunni.

Nokkrum dögum síðar átti ég leið í apótekið þar sem ég keypti mér m.a. púður á mína fögru ásjónu. Það var vel merkt í hillu, kostaði um 2900 krónur. Á kassa fannst mér reikningurinn eitthvað hár og skoðaði málið. Og jú, það var verið að rukka 3300 kall fyrir púðrið. Þar var næstum stolið af mér 400 kr.

Flestir sem ég tala við segjast aldrei fara yfir kassakvittanir og ekki pæla mikið í þessu.  Ég velti því fyrir mér hvaða upphæðum íslensk fyrirtæki eru að ná svona af neytendum á hverjum degi. Ég er viss um að það eru stórar upphæðir, svona miðað við mína reynslu sl. daga.

Nú má segja að það séu örugglega gerð mistök í hina áttina líka, þ.e. að eitthvað sé undirverðlagt eða gleymist að stimpla það inn. En ég fylgist líka með því og það er því miður ekki að gerast eins oft, eða eiginlega bara aldrei.

Skrítið!

 

Til hamingju konur.... og karlar!

Mikið rosalega erum við komnar langt í jafnréttisbaráttunni! Við stöndum okkur eins og hetjur og hið sama er að segja um allar þær konur (og kalla) sem hafa lagt sitt af mörkum síðustu 100 árin.

Ég tileinka þennan dag öllum þeim sem  hafa á einhvern hátt beitt sér fyrir því að jafnrétti náist milli kynja. Þar er ekkert viðvik of lítið og ekkert skref of smátt, allt færir okkur í  rétta átt. 

Áfram svona konur og kallar!

Mig langar að stela smá texta úr kennsluefni í jafnréttisfræðum sem sómahjónin Ásdís Olsen og Karl Ágúst Úlfsson hafa samið og er algerlega frábært. Bókin heitir Kynlega klippt og skorið og er eitt af þessu góða sem gert hefur verið í baráttunni fyrir jafnrétti.

 

Hér er hluti af snilldinni:

...farið að síga á seinni hálfleik í þessum kynjaleik og það verður að segjast alveg eins og er að kvennaliðið hefur átt mjög undir högg að sækja, það er þegar búið að drekkja fjórum úr liðinu og ein var brennd á báli um það bil sem flautað var til leikhlés, en bíðum nú við, nú er eitthvað að gerast hérna upp við vítateig karlaliðsins, þær berjast eins og ljón, jú þær mega eiga það, blessaðar og það er MARK!  Kvennaliðið hefur skorað mark, sem þýðir þá að þær eru komnar með erfðarétt. Karlarnir eru hálf kindarlegir, því fram að þessu hafa þeir einir fengið arf eftir eldri leikmenn, en kvennaliðið ætlar ekki að láta staðar numið og nú vilja þær fá að ganga í skóla, og SVEI MÉR ÞÁ! SVEI MÉR ÞÁ, ég hef bara aldrei séð annað eins, kvennaliðið hefur unnið sér rétt til að ljúka prófi eins og um karlleikmenn væri að ræða - dómarinn er eitthvað ósáttur við þetta, hann tekur upp gula spjaldið, en - nei, hann hættir við og hvað gerir hann, jú, hann ákveður að gifta þrjár úr kvennaliðinu, og þarna eru brúðgumarnir leiddir fram á völlinn og það er verið að sækja prestinn, en bíðum við, bíðum við - þær neita! ÞÆR NEITA AÐ GIFTAST ÞESSUM LÚÐUM, SEGJA ÞÆR, og það er allt að verða vitlaust á áhorfendapöllunum og karlaliðið veit ekki hvaðan á það stendur veðrið - sko, nú er það ekkert annað en rauða spjaldið sem gildir, það er engin spurning, en svei mér þá, ÞÆR HÆTTA EKKI SAMT!! ÞÆR HÆTTA EKKI og nú halda þær því fram að dómarinn sé hlutdrægur og að allar reglur séu öðru liðinu í vil!!!

 ...þær geysast inn á vallarhelming karlanna og ég sé ekki betur en að þær séu komnar með KOSNINGARÉTT, jú gott fólk, þær eru komnar með kosningarétt og nú greiða þær atkvæði alveg til vinstri og hægri. Uss, uss, uss, er nú ekki nóg fyrir þær að greiða á sér hárið. Hvað halda þær að þetta sé - einhver kerlingaleikur? Og hvað eru þær að heimta núna? Sama rétt til að skora mörk? Nei, heyriði mig, hvað á að hleypa þessum dömum langt? Ég sé reyndar að línuvörðurinn er að reyna fá þær dæmdar rangstæðar, en þær eru búnar að skipta um leikkerfi og eru - jú, þær eru komnar í framboð, það munar ekki um það, þær eru komnar í framboð og ÞÆR NÁ KJÖRI!!!

 

 

Frú Sigrún, talsmaður fátækra

Ég vildi að það væri ekki svona mikið stigma að vera fátækur á Íslandi því þá ættu þeir sér kannski betri og öflugri talsmann en hana Sigrúnu. Konan er fífl. 

Hún hefur tekið við styrkjum fyrir hönd félags fátækra en enginn veit í hvað peningarnir hafa farið annað en símreikninga frú Sigrúnar. Þó virðist sem hennar símreikningar séu að mestu tilkomnir vegna hringinga hennar í Arnþrúði á útvarpi Sögu þar sem hún steypir og bullar út í eitt. Enda er hún ekkert að hringja í hina fátæklingana, þeir hringja í hana (þegar Sigrún er ekki að nota símann við að láta ljós sitt skína á útvarpi Sögu) og því kostar það frú Sigrúnu ekki neitt.

Heyrði í konunni í útvarpinu um daginn, rétt eftir að ljóst var að ný borgarstjórn væri að taka við í Reykjavík. Henni finnst við hæfi að vera með pólitískan áróður í krafti "embættis" síns sem talsmaður fátækra. Og hverja eiga fátækir svo að kjósa? Jú, Sjálfstæðisflokkinn, ef marka má orð frú Sigrúnar. Hún gekk meira að segja svo langt að segja að hringingum fátækra til hennar hefði stórfækkað þessa mánuði sem morfísgengið réð í borginni! 

Hún bara hlýtur að hafa verið að djóka.  Eða getur einhver sagt mér hvað stuttbuxnaliðið gerði svona mikið fyrir fátækt fólk í Reykjavík þennan stutta tíma sem leið áður en það klúðraði borginni úr höndum sér? Mér þætti gaman að vita það. 

Halda þeir að ég sé fífl?

Ein spurning eftir að hafa horft á fréttir og Kastljós. Á maður að trúa því að Bingi og gamli góði Villi hafi ákveðið að sameina GGE og Rei og aldrei rætt um framtíð þess, ekki einu sinni næstu dagana eftir stofnun? Að viku eftir sameiningu fatti þeir svo bara að annar vildi eiga en hinn selja?

 

Vildi hafa hárið hans Dags og fleira ómerkilegt stöff

Ég er alltaf að velta því fyrir mér að gerast aktívur bloggari. Hef oft margt að segja og langar að tjá mig. En hef tekið þá ákvörðun að blogga ekki í vinnutíma, nóg annað að gera þá, og þegar ég kem heim á daginn er ég eitthvað svo tóm og hef ekkert að segja.

 

En dagurinn í dag var skemmtilegur og spennandi. Byrjaði í ondúleringu og svo fengu Reykvíkingar nýjan borgarstjóra. Oh, ég vildi að ég væri með hár eins og Dagur, svo dökkt, þróttmikið, glansandi og liðað. Ég myndi samt láta það vaxa og fá mér smart klippingu.

 

Ég held hann sé með svona glaður á myndinni af því að hann er með svo ræktarlegt hár. 

Hvað eru Sjálfstæðismenn að pæla þegar þeir ákveða að tala eins og þeir hafi ekki gert neitt rangt nema "standa við prinsippin sín." Halda þeir að fólk muni ekki hvað gerðist í siðustu viku? Halda þeir að það sé bara hægt að koma og standa eins og vel uppraðaður barnakór og ljúga borgarbúa fulla með orðum eins og eining, prisipp, vinátta og bræðralag? Mér er eiginlega skítsama hvernig stjórn er í Reykjavík fyrst þessir sjálfumglöðu ungliðar hafa fengið sparkið. Þoldi aldrei yfirlætisfullt glottið þegar þau tjáðu sig um mál eins og þau ein hefðu höndlað sannleikann en við hin værum bara vitleysingar, ráfandi í myrkrinu. Arg.

 

 Vona að Robin, kona Dr. Phil, sé með stórt hlutverk í þættinum í dag. Þá get ég sleppt því að horfa því hún er svo mikil hörmung (Dr. Fil er svo aumingjagóður að hann er að troða allri fjölskyldu sinni og ömmu hennar í þættina sína). En þá horfi ég á alla fréttatímana frá upphafiu til enda. Ok, þátturinn byrjaður og Bill Cosby er gesturinn, ég yfir á fréttir um leið og þær byrja.

 

Og ég ætla ekki að elda í kvöld, er bara ekki í stuði. 

 

Tilviljun? Held ekki

Ég týndi fína gemsanum mínum á skrallinu í gærkvöldi. Er þó ekki úrkula vonar um að hann finnist því ég reyndi að hringja á leigubíl rétt áður en einn slíkur stoppaði fyrir okkur Ibba. Leigubílastöðin hefur þó ekki frétt af fundnum Samsung samlokusíma með milljón og tveimur númerum í. 

En, það gerðist líka í gærkvöldi að við Ibbi unnum líka þennan flotta gemsa í happdrætti á árshátíðinni sem við fórum á.

Tilviljun að týna gamla símanum rétt eftir að maður fær glænýjan? 

En símaskráin mín er mér dýrmæt í starfi mínu og ég dey ef hún er töpuð.  

Myndir af öllu allsstaðar

Símar í myndavélum eru þarfaþing. Nú eru til myndir af öllu og þær eru komnar á fjölmiðlana um leið. Ég var soldið hrifin af þessari, sérstaklega kallinum sem er út í glugga á húsinu sínu og ráðalausri stúlkunni í litla, svarta ballkjólnum. 

Ég man eftir nokkuð heitri umræðu um svona myndir af vettvangi sem fram fór fyrir nokkrum árum. Þá hafði bíl verið ekið út af Reykjanesbraut og hann oltið. Hópur flugfreyja kom að slysinu og hófust handa við að velta bílnum á réttan kjöl, í pilsum og hælaháum skóm. Einhver á staðnum kaus samt frekar að draga upp símann sinn og mynda aðfarirnar. 

Ekki voru allir sáttir við að myndin var birt í fjölmiðlum enda minnir mig að slysið hafi verið alvarlegt og aðstæður erfiðar. Nú eru hins vegar flestir búnir að sætta sig við þessa nýju tækni og afleiðingar hennar. Flestum fjölmiðlum er líka treystandi til að fara vel með myndir sem svona berast þeim. 

Bakkaði á fjölbýlishús